龍鳳號 (裝修中)

同事介紹呢間餐廳好好味，可惜返工時間lunch time長期超多人，放假同小朋友一齊黎食。門口就有水供應，好細心，就算平時排隊都有啖水飲下。但我黎得台式餐廳一定飲珍珠奶茶，奶綠仲好飲，有少少綠茶苦澀味，珍珠煙勒，呢度係溝燕麥奶感覺更加健康。叫咗一碗滷肉飯，配滷水豬耳，仲有呢度嘅招牌鴨舌，首先講滷肉飯，味道濃郁，豬肉肥瘦適中，好香好味。魯肉飯本身肉都好多，其實一碗飯都已經好精彩，滷水豬耳唔係咁多地方有得食，我哋叫咗試吓非常有驚喜，好入味好爽口。但最正係個鴨舌，我以為係好似台灣咁只係普通滷水味，但佢原來用咗秘製醬汁，有洋蔥有䓤一齊食，超級好食，仲有醬汁用嚟撈飯一流，加上佢好入味，連小朋友都食到唔停口，我亦都估唔到小朋友幾歲人仔原來咁鍾意食鴨舌，呢度我哋真係因為呢碟鴨舌一定會再嚟。