亞南雞煲

營業中

休息中

長眼界的體驗，唔知會唔會比老闆拉黑的點菜推薦。😂兩個炸物都係比大多小菜館更好既質素。椒鹽鮑魚炸衣輕薄剛好，重點係火路精準僅熟，輕輕裹上椒鹽，唔洗喼汁已可清碟。如果要追求更好，可能要去六福摘星了。脆皮牛腩更加高難度，除左炸功之外，牛腩既選材同準備功夫影響住成品既完成度。上枱既一舊野，夾出一片睇睇就知道乜料。香料氣味充足，炸皮厚而脆加強左牛腩既口感。炸物完食，應該胃口已開。叫雞煲？不如叫個湯飲啦。竹笙花膠雞湯（煲），個人黎講覺得升級新鮮雞好抵（去開買餸就明）。小資級別建議食法。火鍋店既好處係每枱都有個電磁爐，可以等個雞湯慢慢滾起。滾起之後較到一千火等多五分鐘，就可以飲湯食雞。雞肉剛好，花膠爽滑，竹笙吸滿了雞湯，而個湯係有厚度既。記得要同時間競賽咁享受啲雞，盡量喺飲完三碗湯之前就啱啱好。而花膠果時就變成淋滑版本。兩口子撐枱腳既話相信好夠皮。好胃口嘅叫店家加點雞湯，淥多個烏東一定夠。如果唔係隔離枱傳黎陣陣麻辣雞煲既香氣。你真係唔會覺係一間雞煲店。