中環茶記 (已結業)

例牌放工食個快既晚餐然後去做gym，今次去左中環茶記，因為被餐廳金碧輝煌嘅牌匾吸引左。餐廳燈光非常充足，樓底高。店內一枱一椅一磚一瓦都同八、九十年代懷舊冰室無異，天花上既吊燈更加令人懷念。除咗餐廳牌匾吸引之外，另一吸引之處就係邪惡鹹蛋流心西多，我同朋友見到張相都已經流晒口水🤤冰室不二之選必定係紅豆冰。紅豆份量唔算多，但煮得幾稔並不失口感，另外奶香味濃。朋友叫既懷舊雪兔以雜果賓治為底，漸層加上棉花糖令色彩非常繽紛。估唔到冰室都有鰻魚食。炭燒鰻魚($98)超大條，魚肉具彈性。雖然冇入口即溶嘅口感，但都算嫩滑，伴隨淡淡既炭燒香味。另外仲叫咗咖喱牛腩配蔥油餅（$78）。完整牛腩大約有六七件，牛腩炆得軟腍但略嫌偏瘦，咖喱汁唔會太嗆，配蔥油餅一流。登登登登！最後出場就係邪惡鹹蛋流心西多（$48）。坦白講切開嘅時候有少少失望，因為見唔到流心嘅形態，不過味道就非常邪惡地出色，入面餡料全部係起左沙既鹹蛋黃，鹹香味道非常濃郁，略帶少少奶香味。食完呢餐卡路里超晒標，但邪惡鹹蛋流心西多一定要再encore。另外大家去完蘭桂坊想食嘢又多一個選擇。