影片
更多
2015-08-21
5954 瀏覽
因為公司喺灣仔，好多素食餐館都無得訂位，咁啱呢間有，所以今年的生日午餐就訂咗麗姐㕑房。之前無去過，不過見食評都唔錯，我哋對環境唔係太高要求，所以試吓。訂位時要order定嘢食，幫手訂位的女士好好人，我心諗：素食館啲人真係友善㗎啫。嗯！人類真係好天真。Book一點正，一點鐘去到樓下，等𨋢期間就收到call：「係咪嚟緊，我哋要交張枱畀人。」ok ok，𨋢都唔等，慌張嘅大家即刻飛虎隊上身：跑樓梯！都係二樓啫。奈何我哋並唔能夠突破人類極限，上到去，頂！遲咗一分鐘，侍應再面黑黑同我講多次：「你哋遲到我要畀張枱人㗎勒！」真係當頭棒喝，我覺得自己真係死不足惜。雖然講咗好多次唔好意思對唔住，但係若然有刀仔喺手，我真係會當場切腹謝罪。搞到佢咁唔開心，真係好想喺生日時封返封利是畀佢；不過無利是封喺手咋。睇見牆上掛嘅佛偈，如果俾我加多一幅的話，我會喺「莫生氣」隔籬加「咪遲到」。我決定下次，如果仲有下次，不過多數都唔會有下次，我會book遲十分鐘；因為我真係希望令食素嘅大家開心，千祈唔好好似食咗成隻牛咁嬲豬。懷住內疚、悔恨嘅心情，到底我仲有冇資格食呢？我好疑惑，不過飯菜經已預備好，而呢張咁稀有咁珍貴咁不得之了
嗯！人類真係好天真。
Book一點正，一點鐘去到樓下，等𨋢期間就收到call：「係咪嚟緊，我哋要交張枱畀人。」ok ok，𨋢都唔等，慌張嘅大家即刻飛虎隊上身：跑樓梯！都係二樓啫。奈何我哋並唔能夠突破人類極限，上到去，頂！遲咗一分鐘，侍應再面黑黑同我講多次：「你哋遲到我要畀張枱人㗎勒！」真係當頭棒喝，我覺得自己真係死不足惜。雖然講咗好多次唔好意思對唔住，但係若然有刀仔喺手，我真係會當場切腹謝罪。搞到佢咁唔開心，真係好想喺生日時封返封利是畀佢；不過無利是封喺手咋。睇見牆上掛嘅佛偈，如果俾我加多一幅的話，我會喺「莫生氣」隔籬加「咪遲到」。我決定下次，如果仲有下次，不過多數都唔會有下次，我會book遲十分鐘；因為我真係希望令食素嘅大家開心，千祈唔好好似食咗成隻牛咁嬲豬。
懷住內疚、悔恨嘅心情，到底我仲有冇資格食呢？我好疑惑，不過飯菜經已預備好，而呢張咁稀有咁珍貴咁不得之了嘅枱又因為大人不記小人過的關係，喺千鈞一髮之間依然留咗畀我呢個超齡廢青，所以我無資格話唔食，只好講句多謝賜飯。
呢碟黑醋咕嚕係唔錯嘅，我好鍾意黑醋味。呢陣酸味，提醒我約人唔只要準時，更加要早到，否則會令人好心酸。
而呢個黑松露牛油果炒飯，真係好香，味道剛剛好，應該好多人like。諗起自己成日激親人，應該好早歸西，喺有機會再食呢碟咁香嘅飯之前已經香咗。
以為逢係藕餅都好食嘅我，今次真係有少少失望。有啲太粉，唔算好味，之但係得人恩典千年記，有枱畀我噃，就算唔係太好味，都應該係我嘅問題，又或者係上天畀我嘅考驗：「你以為你有資格食好嘢咩？你邊位呀？你係一個只識遲到嘅廢人咋！」
聽聞流沙餃係招牌菜，不過口味嘅嘢真係每個人都唔同。我嘅意見唔重要，最重要係呢度嘅員工開心，所以呢碟點唔點都ok，最緊要係咩呀？係唔好遲到囉，又唔記得。
燉湯，好香菇味，素湯嚟講都好好味㗎！遲到嘅人去到十八層，會唔會俾人燉呢？好緊張啊！
荷蘭豆雲耳炒淮山，清清哋，淡淡然，唔，好難評價。食物難評，做人就唔可以淡淡然，唔能夠乜都無所謂，遲到嘅人真係要拖出去斬。
粟子腐球，食剩好多，唔好味、唔夠熱、啲汁「瓊」晒？唔係，儍啦！我哋錯，叫得太多嘢啫。千錯萬錯，當然係食客錯。至於好多人講過嘅甜品，無啊。以為有得送？我哋無咁天真，亦都無諗過要叫。人生係苦嘅，生日係罪嘅，遲到係抵死嘅，吃甜品的機會不是我們的。快食，快閃，快升天。願神赦免！
我個喊口，唔係因為唔好食呀，係內疚嘅眼淚呀！吓？乜唔係咁用㗎咩？
張貼
