北海道初雪烘焙 (已結業)

月初去食過深水埗嘅北海道牛乳8.0雪糕，見呢間芝士撻店都有供應，所以襯住週日放假過黎試試。北海道初雪烘焙主打北海道芝士撻，除此之外，仲有雪糕同日式雪糕菠蘿包。本來一心要食雪糕，見到個菠蘿包幾吸引，於是就變左食包。由於早前食過世界第二好食嘅雪糕蜜瓜包，當時非常狼狽，估唔到我都仲有如此勇氣。日式雪糕菠蘿包 $39沖繩菠蘿、菠蘿包已經一早砌好，置於櫃內，落單後，店員會唧起雪糕，然後快手用紙包好，成個過程不消一分鐘。接過手後我快速影左兩張相，由於呢個包係常溫，所以雪糕冇溶得咁快，但我都唔敢玩太耐。菠蘿包每日新鮮焗製並限量60個，食落似烘鬆餅，有別於港式菠蘿包，唔係唔好食，只係冇乜特別，而且包碎多，好嗆喉，食到我猛咳…包面似鬆餅，包底卻似豬柳漢堡嘅包，煙煙韌韌…以包而言，我覺得世界第二好食蜜瓜包嘅包比較軟綿鬆軟。沖繩菠蘿輕輕烘過，唔會出水，酸酸甜甜。至於我一心黎食嘅北海道8.0牛乳雪糕，冇失望！牛乳味強烈，質地濃厚滑溜，甜度適中，好食整體黎講，菠蘿包唔係新鮮熱辣，所以雪糕冇溶得咁快，但變相個包就冇咁好食。呢個包普普通通，我試一次就夠！但牛乳雪糕不錯，可以淨食雪糕！