麵道 (已結業)

今日同朋友係石門食飯，點知塞車遲到，而原來麵道的拉麵係每日限量供應，當湯底賣晒就冇得食，我朋友好好彩地叫到最後兩碗拉麵。燒餃子(4隻) - 煎得好好味，而且餃子有好多肉汁，真係令人讚不絶口。叉燒味玉醬油豚骨湯拉麵 - 師父係特登等埋遲到既我到左先整，以保證新鮮，而我都係食完先知，難怪個拉麵真係夠新鮮夠熱辣，個湯底選左中味，真係香得來唔會太濃味，亦唔會太多油，平時唔太鐘意飲DD湯既我都忍唔住飲左幾啖。麵質同樣可根據個人喜好選擇，適中真係唔軟唔硬，照顧唔同人的需要。湯底同拉麵真係冇得輸。但個叉燒得兩薄片，味道係好食的，可惜分量少左D，唔太夠喉。溏心蛋係原隻上，唔似一般係切開左得返半隻蛋，而且真係好香好好味，真係好感動。朋友叫左雞叉燒味玉雞白湯拉麵，味道都好似唔錯，下次一定要試埋其他。整體而言，估唔到石門都有咁高質素的拉麵館，環境都好企理，而且價錢可以接受，真係值得再來食呢。