香江茶餐廳

營業中

休息中

熱得不能再熱的天氣，逛街市前先來醫醫肚，三人行剛好可以試勻乾、濕、辣的無敵炒麵組合，簡單來說即是星洲炒米、乾炒牛河及肉絲炒麵。先來的炒牛河，然後到炒米，炒麵一貫港式炸法，製作需時也要等上廿分鐘左右，當三款麵食齊齊整整並排而置，都幾熱鬧。乾炒牛河未食已傳來陣陣油香，薄身河粉面帶油光，放得太耐的關係，吃落又唔覺好香牛肉薄切成細片質感麻麻，再加多些少銀芽感覺會更好。星洲炒米，炒得乾身又唔會黏著，輕易夾上手又輕易放入口，預期的少少spicy，叉燒絲幾條，還不如「真好味」的梅頭叉滋味，粉是炒得夠水準，只是由細到大都唔喜歡那款spicy味，隨便夾了兩綴試試就算。後來的肉絲炒麵，是清得最快的一碟，炸脆的蛋麵淋上杰濃的肉絲汁，麵邊位唔見焦燶，加埋肉汁令麵條軟化，又脆又腍，很不錯。同場加映冬瓜粒海鮮湯飯，足料的海鮮湯包炮製，數之不進的材料有墨魚、魷魚、蜆、蠔、蝦仔．．．扣底後仍有唔少飯，「應該」可以食得好飽的，但在大家的胃納愈來愈矜貴時，無理由投資在此品上。可能是天氣太熱關係，吃得麵汁紛飛，之後，買餸去也。