臻味冰室豬扒酸辣米線

營業中

休息中

明明唔食得辣，但係又鍾意食酸辣粉麻痺口腔嘅感覺，於是去左臻味叫咗碗紅薯粉食吓，順便感受吓同桌以前牛頭角返工個陣附近餐廳嘅味道。睇睇餐牌，選擇多而且價格親民，完全明白點解同事們晏晝成日食呢間。炸魚肉雲吞 配蕃茄醬 份量多到好似山咁高，熱辣辣脆卜卜，係魚肉比想像中少咗啲。麵到咗之後浸吓湯再食，好似打邊爐食響鈴咁，一樣好好食。因為選擇困難，叫咗個咩都有啲嘅雜錦小窩配紅薯粉，紅薯粉煙煙韌韌，叫咗多花生更香口。特別鍾意豬排同韮菜餃，好夾湯底。只係今日個小小辣變咗做小辣咁，弱者如我已經食到淚流滿面。忍唔住試埋蠔仔牛脷上海麵。蠔仔新鮮，牛脷有咬口。上海麵因為冇紅薯粉咁滑潺潺，特別掛湯。埋單百五蚊左右，非常滿足。不過原來呢度收得幾早，夜收工想食真係要預吓時間。