四季良晨 (新都城中心) (已結業)

奉行台灣文青主義，無時無刻享受時光，係呢度帶出嚟嘅訊息。餐廳裏面，木系嘅擺設，到處都係書架同書本，書卷味滿滿，食嘢不忘隨手拎一本書閱讀。台式食物例如粉麵同埋飲品出名好味大家都知道，味道方面嘅多元化例如麻辣或者養生都可以滿足到不同需要。地獄三盛牛肉麵，$73。鍾意食辣嘅我，毫不猶豫選擇咗呢一味菜。材料系腱心牛肉，牛肚同埋牛丸。佢嘅麻辣亦都冇令我失望，勁道十足嘅麻辣裏面仲會食得出一股紅燒牛肉嘅味道，湯底簡直令人一食上癮，配合有咬口嘅麵質，唔需要花費太多光陰就成碗落肚。另外叫咗杯芝士奶蓋阿華田，濃厚嘅芝士奶蓋下面係充滿港式風情嘅阿華田，呢個比較似台灣同香港嘅fusion，味道幾好唔錯，但比較起平時台式嘅芝士奶蓋飲品來得飽濟。