廚十三老壇酸菜魚 (D2 Place ONE) (已結業)

今晚收工同朋友咁啱係荔枝角附近，佢問我有冇聽過廚十三老壇酸菜魚，身為麻辣控既我雖然平時唔太好酸辣野，為免掃興都陪老友試下啦。3個人嗌左個小份老壇酸菜魚(餐牌寫住2人享用)，加左7款配菜: 午餐肉、金菇、豆腐、腐竹、寬粉、藕片、青筍片，再另外叫左小食: 雨露均霑同泡椒鳳爪。泡椒鳳爪小小辣，唔食得辣都接受到嘅辣度，泡椒入味又爽口。凍凍地非常開胃！後尾醒起嗌酸菜魚個時姐姐冇我地要咩辣度，唔知係咪有得揀嫁呢？！嚟左個酸菜魚個時真係嚇左嚇，個碗嘅容量超級大呀！本來唔抱太大期望，畢竟我唔好酸嘅嘢食，點知食左之後又幾正喎。酸酸地易入口，湯唔會太腥，魚片夠嫩滑，配菜都好入味，索哂湯既精華。雖然明顯見到湯面既油，但我都係忍唔住去飲個湯，鍾意食辣嘅我真係覺得個湯再辣啲就perfect喇！！雨露均霑，即係紅糖糍粑，灑左黃豆粉係面，配搭黑糖漿。熱熱甜甜，咬落外脆內煙韌，食完呢個甜品覺得非常滿足。好彩冇叫大份(3人份量)炸，我地3個人叫小份都已經食唔哂，最後捧住個肚走。今餐真係夠晒豐富喇！