麻甩系(花甲粉)

營業中

休息中

經過鋪頭已經傳來陣陣麻辣蒜香味，以花甲粉及麻辣花雕雞做招牌，供應多款重口味小食、滋補糖水等。雖然店名有麻甩二字，但裝修都唔馬虎，貼住食物照片，又有五光十色嘅燈光影照。話明係招牌，一定要食世一花甲粉，配麻辣湯底，麵底揀粉絲。食物即叫即煮，熱辣辣。新鮮花甲每隻飽滿，完全冇沙。配料有大量金菇、娃娃菜、豆卜，全部用料都能夠吸盡湯底精華。而且粉絲另外分開放，唔怕浸得太耐。少辣唔會好嗆，辣度足夠，蒜蓉香配辣味絕配。望見湯底都唔係艶紅辣色。冬天食麻辣粉，夠暖。麻辣花雕雞，可以配年糕或者薯條。一打開蓋，呢個麻辣味比花甲粉濃烈好多。雞件面頭已經見到有花椒乾粒，另有香菜配搭。辣味滲入哂去雞件肉內，外至雞皮，內至咬雞骨，都食到花椒嘅辣味。後勁感覺到麻味，嘴唇會麻麻地。做到帶辣及帶麻嘅口感，唔係得死辣。而年糕片煙韌，原本年糕冇味，但配辣汁一齊食，完全夾。鍾意食辣嘅人，一定唔可以錯過鋪頭嘅辣味食物之選，唔食得辣嘅，可揀蒜或者其他食品。