捌壹壹 (奶路臣街)

營業中

休息中

我一向都係辣妹子，無辣不歡，今日去咗旺角811食四川菜，過下口癮。佢哋既必食冷鍋酸菜魚做到「麻.辣.鮮.香」，冷鍋嘅意思係已經煮好，唔使再加熱，避免魚肉過熟。酸菜魚湯底加入咗花椒籽同辣椒，湯底飲落去首先會有麻香味，後勁有辣味，吾會太油，而且飲完個湯吾會覺得口渴，仲有大量配料 - 酸菜、金菇、大豆芽、水晶寬粉，配料完全吸收晒湯嘅精華。佢哋用嘅酸菜係自家製，食落去爽口，水晶寬粉晶瑩通透，煙靭Q彈。魚肉超級鮮嫩，食得出係用新鮮生魚，食到停唔到口😋酸菜魚可以自由揀辣度，亦可以揀唔辣，今次要咗小辣，如果好食得辣嘅朋友可以點中辣。另外再叫咗兩個小食 ，都係揀咗小辣- 尖椒皮蛋同埋麻辣海蜇，尖椒皮蛋係用黃金皮蛋，糖心蛋黃嘅部份粘牙軟糯，沒有澀口感，上面有少許尖椒片同生蒜蓉粒，夾埋一齊食都好味。第一次見到麻辣海蜇呢個配搭，爽口嘅海蜇吸收左麻辣汁好正。佢哋有好健康嘅飲品選擇，可以解辣，我同朋友分別要咗杞子菊花蜜同埋蜂蜜雪梨茶，食完辣嘢潤返喉嚨。