十二味功夫 (已結業)

以前打正黃埔地鐵站A出口嘅係功夫點心大概一年前見佢裝修，我以為佢結業，點知原來係將舖位縮細一半，分咗一半比十二味功夫😮😮呢到同十二味烤魚係同一集團，所以個menu好似樣，都係簡單易明同埋選擇超多😱唔知佢同十二道鋒味嘅chef lemon 有冇關係呢😂😂一入座已經feel到佢陣中國四川風，紅燈籠🏮配上古色古香嘅裝潢，好似返咗大陸咁😂😂因為我朋友唔太食魚，所以就無試佢嘅招牌酸菜魚，不過就嗌咗佢另一個必食之選口香鍋😍朋友唔食辣，所以我哋揀咗秘製醬香鍋，配料另計，雞軟骨$48、牛肉$48、萵筍$22、腐竹$22、寬粉$22，上碟時我地仲擔心食唔食得晒😝結果太惹味我地兩個人清晒！另嗌多咗個糖醋排骨，但其實係完全無骨的，超送飯😍高質小炒！甜品叫咗紅糖糍粑，之前喺啲川菜舖試過就念念不忘！呢個好似麻糬咁嘅小食，佢係用糯米製，加咗啲熟嘅黃豆粉，用碟仔上咗啲紅糖漿，食時比你蘸醬食，嗜甜兼愛煙韌口感人士如我，一定好鍾意！