新南苑雞煲小菜點心 (已結業)

去開竹園，夜媽媽搵個地方食嘢，新南苑又有小菜、又有點心、又有鐵板餐，啱同行人士唔同口味，一於試吓。去到舖頭門口，見到餐廳入面差唔多滿座。等咗一陣，就有得入座。Menu冇唔同類型嘅選擇，去到夜晚都仲有得飲茶食點心。二話不說，叫咗一籠紅棗糕試下先～紅棗糕上枱熱辣辣，三層分明。上下兩層好香紅棗味，中間白色嗰層則充滿梛香甜味。其後就分別叫咗兩個小菜，分別係水煮牛肉同埋麻辣鴨血煮海鮮。水煮牛肉幾大盤，牛肉片放喺上面，下面放有大量芽菜、薯粉、木耳等配料索湯汁。至於麻辣鴨血煮海鮮，鴨血完整唔易散，大概有6至7塊。而海鮮種類有蟹柳、魷魚、帆立貝、蝦等食材，每樣有啲😂除咗兩個小菜，我哋好random地想試下鐵板餐，叫咗黑椒汁雞扒拼帆立貝😅 鐵板喳喳聲上枱，雞扒大大塊，雞皮煎得有啲脆口，切落去雞肉會有少少雞油滲出。帆立貝有兩隻，比起剛才鴨血海鮮入面嘅帆立貝更爽口，配菜有薯條，而加5蚊就有兩塊新鮮出爐嘅牛油豬仔包！鐵板餐額外送餐湯＋飲品，鐵板餐七十幾蚊，價錢算可以。