黃金燒味 (已結業)

我同朋友喺修頓踢完波好鬼肚餓，途經軒尼詩道嘅時候，一道金黃色燈光吸引左我，原來係一間餐廳嘅logo，名叫黃金燒味。咁啱我嘅花名叫黃金右腳，覺得都幾有緣，就同朋友入咗去。根據餐牌，餐廳除咗燒味外，住家燉湯同蒸魚都係招牌之一。本身諗住三樣都試曬，可惜蒸魚已經賣晒。估唔到燒味店都會提供小食，係涼拌蘿蔔同青瓜。首先係我叫既四寶飯出場，左邊係白飯同淮山杞子螺頭燉雞湯。右邊有四寶同菜心。從下圖可以清楚見到叉燒肥膏同肉層次分明，外層帶點微焦，食落幾鬆軟。至於乳豬肉味香，食多幾件都唔會太膩。不過皮唔係太脆。粉蹄口感清爽，燒鵝皮脆啖啖肉，香味四溢。估唔到燒味店提供燉湯，實在非常難得。飲完非常滋潤，而且幾足料，不過略嫌太油。至於朋友叫咗住家燉湯餐，套餐包括乳豬燒鵝瀨粉，菜心同燉湯。瀨粉非常爽滑，配以藥材香味嘅湯底，感覺幾健康。朋友叫嘅乳豬色澤非常紅潤，肥瘦適中。餐廳凍飲全採用急凍杯，令客人飲用嘅時候涼透心。如果叫單拼碟頭飯只係$49，係灣仔區來講算平，值得一試。