小南國 (已結業)

係港鐵站見到廣告話沙田新開左間小南國，心郁郁想食上海菜，就黎左呢度食晚飯。七點幾去到，好多人等位，間餐廳又細，等左成半個鐘先有位。以往通常去中環個間小南國食Lunch, 全部散叫，呢度有二人餐，好似幾多野食，就試下啦！前菜雙拼燻魚，百頁卷燻魚幾好，甜甜地，但好多骨。百頁卷都唔錯，馬蘭頭好香"草"味。清炒河蝦仁我同男友最愛既菜式，爽口，但多油。砂窩雲吞雞湯一人得一碗，好少喎！湯好濃，有雞味，但佢地俾雞翼我地，覺得好奇怪。香酥鴨呢個最好，用片皮鴨既皮，包住香酥鴨，蔥，青瓜，加D紅色酸酸地既醬，好好味，鴨一D都唔酥，有少少肥，好香口，正！勝瓜炒菌絲賣相晶瑩剔透，但其實全部都係油，D油多到我要用清水過一過先敢食。小籠包自問我夾小籠包都有一手，但呢個小籠包我就失手，一夾即裂！皮比較厚，一般水準。雪梨紅蘿蔔糖水未食過咁既 Combination，味道一般，甜甜地，不過幾滋潤。我下次去沙田唔會再黎小南國，服務麻麻，有咁多好食過佢又平過佢既多的是。都係去中環個間好D。