伙食工業 (已結業)

好耐冇見一個好難約嘅朋友，知佢係火炭返工，所以約佢係佢公司附近陪佢食lunch。係我心目中火炭就係一個工業區，要我諗起佢個頭有咩餐廳都真係唔識，所以就交比佢呢個地頭蟲帶路。佢話呢間餐廳係呢邊算幾出名。我去到望一望，個外表都幾特別，同佢所處於嘅工廈格格不入，但幾吸引人入去試。入面嘅舖面都幾大，但午餐時段都坐滿晒。呢度嘅午餐都算有幾多選擇，飯同麵都各有一頁嘅menu。朋友推介左呢個紅燒半筋半牛麵叫我試，於是我跟佢叫黎試下。呢碗麵睇落份量唔算太多，但食落係出奇嘅飽。欣掌佢嘅紅燒牛筋同牛肉都係多，送晒成碗麵我都未食晒D餸，比起出面好多嘅台灣餐廳大方好多。牛筋好煙韌，唔會太稔或者太硬，牛肉都好嫩口，質素算係認真唔錯。湯底好好飲，唔會太鹹，唔小心一飲再飲，雖然飲完有少少口渴麵有咬口，份量都好足。性價比真係超高，難怪咁多人係openrice 推介呢個。飲品我就叫左杯凍咖啡，普普通通，正正常常啦～