Aroma Truffle (已結業)

一向都好鍾意黑松露味嘅食物，近排見好多人介紹呢間，見佢除咗銅鑼灣之外，喺尖沙咀海港城都有新分店。咁今日去開尖沙咀，就買一包嚟試吓啦。本身都好猶豫到底揀邊隻美好，因為佢有三隻味，一隻係原味，一隻有蜜糖味，仲有一隻有芝士味添。好彩店員好好咁提出比我試晒三隻味，先再慢慢揀。三隻味其實都好好食，其實都好想買晒㗎啦。不過又怕肥，所以買住一包先啦。每包$69。最後我揀咗原味，唔知係咪因為我第一隻試嘅味就係原味啦，我覺得原味嘅黑松露味係最重，啲黑松露味過後仲會食到薯仔嘅香味。所以我覺得作為一個黑松露味嘅愛好者，如果淨係買一包，我就會揀原味啦。返到屋企忍唔住第一時間就打開包薯片嚟食。一撕開咗個包裝少少，成浸黑松露味湧晒出嚟，成間房都係黑松露味，可見佢真係好香。不過建議食嗰陣都係逐塊逐塊食，每食完一塊，隔一陣先食下一塊，就最可以享受到啲黑松露味啦。店員仲俾我試埋呢度嘅特製辣醬，味道好香好特別，仲有少少燒烤味嘅感覺添。仲有新出嘅黑松露味爆谷，我都有試埋，都係有濃濃嘅黑松露味。不過都係下次先買啦。窮學生太窮要儲下錢先。