影片
更多
2013-05-21
1860 瀏覽
其實早喺舊年表姐一家已經極力推薦我地去食Zuma個日本放題，話每位五百幾蚊任飲酒任食日本料理，真係好超值。碰巧見咁耐冇見契妹，大家又咁鍾意食日本野，就約埋一齊去大吃大喝一餐！做足功課o既XO仔一早知Zuma難訂位，所以早兩個幾星期前就已經打定電話book枱。真係好奇怪，小弟第一次打去時，係閒日o既四至五點鐘左右，因連續打左幾次都係電話錄音，話條線好忙碌，最終都係留左個電話號碼，等餐廳得閒先覆我，結果都等到夜晚九點幾。接線生為外籍女子，但其態度頗不友善，其英語亦實在好難理解，我有好多問題都要佢重複答案先勉強聽得明。當時心諗，Zuma主客路會唔會係外國人呢，連接線生都唔洗識講中文，頓時有個不祥o既預感。終於黎到四月七日，心急o既肥肥家族早左十分鐘到。到六樓接待處登記時，哥仔解釋話自助餐準一點半先會比客人入座，早到o既賓客可以先喺個酒吧度飲杯「非免費」飲品。（唔好玩啦，我地都準備以$590 + 10%食你地個任飲任食自助餐，唔通早到十分鐘都要買野飲黎「自我罰款」？=。=””）搭正一點半，接待處開始叫已登記o既客人埋counter帶佢地埋位。好奇怪，當輪到我地時，佢淨係叫我地企喺度，但就安排其
做足功課o既XO仔一早知Zuma難訂位，所以早兩個幾星期前就已經打定電話book枱。真係好奇怪，小弟第一次打去時，係閒日o既四至五點鐘左右，因連續打左幾次都係電話錄音，話條線好忙碌，最終都係留左個電話號碼，等餐廳得閒先覆我，結果都等到夜晚九點幾。接線生為外籍女子，但其態度頗不友善，其英語亦實在好難理解，我有好多問題都要佢重複答案先勉強聽得明。當時心諗，Zuma主客路會唔會係外國人呢，連接線生都唔洗識講中文，頓時有個不祥o既預感。
終於黎到四月七日，心急o既肥肥家族早左十分鐘到。到六樓接待處登記時，哥仔解釋話自助餐準一點半先會比客人入座，早到o既賓客可以先喺個酒吧度飲杯「非免費」飲品。（唔好玩啦，我地都準備以$590 + 10%食你地個任飲任食自助餐，唔通早到十分鐘都要買野飲黎「自我罰款」？=。=””）
搭正一點半，接待處開始叫已登記o既客人埋counter帶佢地埋位。好奇怪，當輪到我地時，佢淨係叫我地企喺度，但就安排其他未登記o既外籍客人入座，莫非黃皮膚就要等耐啲？！等左五分鐘，見勢色唔對，小肥行去counter問個究竟，點知換來接待生冷漠o既對待，似乎有歧視中國人之嫌！當時無人理睬，真係覺得又氣憤又無奈！嘩，再等左五分鐘，當比我地遲到o既食客都已經就座時，肥肥家族終於有得落五樓埋位，點知負責我地張枱嗰位姐姐仔態度仲加惡劣！酒水唔問就冇得飲，問兩句仲黑面神上身，好似我地得罪佢咁，毫不友善！服務態度可以話係上下一心，都係咁唔歡迎食客，真係比一分服務分Zuma都嫌多（Openrice應該考慮加插一個零分比食評們選擇）！Zuma位於置地，即中環核心地段之名牌廣場，搭地鐡連街都唔洗出，隔離又係五星級大酒店，諗住方便得黎都算係高級啦，點知… 其五樓餐室除左樓面高之外，枱櫈都比較矮，室內空調又唔多夠，感覺非常局促且唔自在！因餐廳設有室外座位，除左食客同侍應出出入入之餘，亦有多隻蚊蟲陪伴（唔知係咪同落雨天有關呢？！），自助魚生冇野摭擋，心覺不甚衛生。此外，排隊自取食物時，近廚房暗角位有水，小肥同媽咪都險些跌倒。
話說Zuma個自助餐有兩種成人收費：$490 + 10% 之不含酒精收費；$590之含酒精收費，不過只限包日本清酒Dassai 50獺祭純米大吟釀，紅酒，白酒，同Veuve Clicquot香檳。雖然小肥唔多飲日本清酒，不過都認得出擺出黎嗰啲sake樽同餐牌上及服務生所講o既Dassai 50獺祭純米大吟釀好有出入囉。
身為一個精明o既消費者，小肥最終當然係選擇飲香檳啦！
唔知係服務生本身質素問題，定係Zuma餐廳吝嗇作風所至呢，如果我地唔主動叫人黎，根本係冇人會加酒比我地飲！Zuma個自助餐舖排分成兩部份，一邊係魚生，另一邊係熟食。因為人太多，兩條隊都毫無流動性，大肥爸爸指出，排隊都排左三分一時間，安排非常失當，因此亦造成不少不守秩序o既情況，如「打尖」同一次過攞哂成碟食物走等：
魚生地帶o既前段同後段都係一模一樣o既刺身拼盤，理應可以造成兩個入口，增加流動性，不過Zuma似乎並不同意，只有一邊擺放餐碟。Zuma o既刺身，壽司同卷物種類比小肥想像中少，可以話係同其他非全日本料理所提供o既魚生差不多，真係幾失望。最奇怪o既就係刺身o既形狀，三角形得真係好非一般囉！
熟食嗰邊有串燒，蜆湯，炸雞，雜菜，溫泉蛋，冷麵等等。去到龍尾則好唔夾地擺放左一大盤生蠔。生蠔係自助餐中最差o既一項，勁多沙同渣！熟食中，以串燒最搶手；唔知係因為燒得慢，燒得少，定係啲人一攞就攞好多，成日都冇哂，小肥都係睇見人地有得食燒雞翼同燒肉丸先知有串燒供應。中肥哥哥提到，可能五樓要燒埋六樓客人散叫嗰啲order，繼而造成供不應求o既情況；如果真係咁，小弟建議餐廳及廚房自助餐時間就唔好接散枱，專心一意為自助餐煮製各款菜式。大約兩點三左右，黑面神服務生催促我地落單，order每人一份o既主菜。餐牌上o既選擇尚算多元化，有魚，牛，豬，羊等。小肥覺得最奇怪就係個list後面有兩三款係要加錢先可以叫，如和牛；心諗，如果要人食個五百幾蚊o既自助餐 再加錢食其他食物，不如索性唔好寫上餐牌比人揀啦，感覺好唔大方囉：
Hamachi Neck（油甘魚魚鮫）：姐仔話餐牌上o既油甘魚魚鮫當日”not available”。當多口問佢係咪因為我地食二輪自助餐所以冇哂貨，佢繼續不回應！
Gyuniku no sumibi yaki to kinoko, wafu sauce（Sirloin steak, sauteed mushrooms, wafu sauce）見好多人都叫，賣相又唔差，諗住食牛都算安全啦，所以叫左兩份日式牛扒黎試。可惜，半生熟o既牛扒超韌，就連牙力勁到連碗都可以咬崩o既大肥都話「無能為力，啲肉根本咬唔爛」。
Pork Cheek（豬面額）：肉質好腍，醬汁味道正常，但因小肥唔係好鍾意太腍o既肉，所以只可以講一句「唔係我杯茶」。
Tempura Moriawase（雜錦天婦羅）：每客天婦羅都有兩隻蝦，蝦身爽口彈牙，炸粉份量唔多，炸得又夠乾身，掂呀！依碟天婦羅可以話係自助餐中大家都最滿意o既部份，不過Zuma限定每位食客只可以叫一份主菜也未免太吝嗇啦！
兩點半，正當大部份客人食緊主菜時，自助餐counter已經冇乜人排隊，因為counter上大部份都係吉碟，就連個生蠔盤都消失埋，串燒就更加唔洗講啦，XO仔食左成個鐘都未見過一條串燒！三點鐘服務生們正式宣佈自助餐快將結束，唔會再有食物供應，只會上埋個甜品拼盤，同斟添最後一次酒，三點三就收野。Zuma dessert platter for the table（甜品拼盤）：Zuma個自助餐除左主菜要揀之外，就連甜品都並非任食，小肥真係好懷疑自己係咪食緊放題！每枱客一盤甜品拼盤，人多嗰枱個盤會大啲同多啲餡。客人要落order，工作人員先會喺廚房入面準備，需時大概10-15分鐘。
拼盤入面有雪糕，蛋糕，同生果。其中雪糕會溶，所以客人必需先食；除非食生果者唔食雪糕啦，如果唔係o既話，食完雪糕先食生果，生果就變得唔夠甜。再者，個人覺得Zuma以每枱客人送上一份甜品拼盤，除左小家之外，感覺仲好浪費添，因為唔係每位客人都食甜品，就算食都未必鍾意Zuma比嗰幾款囉！
講真，其他酒店提供o既自助餐除左有任食魚生，生蠔，飯麵，都會有任食龍蝦，牛扒，甜品等，價錢好多都比Zuma便宜，款式更比Zuma多，加上任飲日本清酒貨不對辦，冇獺祭飲，所以XO仔覺得Zuma個日本放題勁唔抵食！其九流之服務及局促之室溫真係食到小肥又「hing」又勞氣！當小肥竊聽到隔離枱客人講左句好有意思o既感想時：”Feels like Zuma is disposing their rubbish through this brunch！”真係好有同感，食客o既高見簡直係一針見血！
張貼
