新斗記 (已結業)

環境4分：中式酒樓格局，張枱感覺比平時酒樓D大少少，感覺冇咁侷促，座位與座位之間都ok，天花板啲燈籠仔都幾得意，所以畀四分。衛生4分：見到啲碗碗碟碟都幾乾淨，可以畀四分。服務3分：侍應都算快手快腳，都幾有禮貌，可以畀三分。 味道2分：1)      碟香煎蘿蔔糕最快嚟到，咁早嚟都只有一個原因，就係一早整定。食第一啖已經知道唔熱，應該係直頭涼涼地又硬硬地，絕對唔及格！2)      然後碟貴妃雞飯，見到有隻雞髀仔，啲肉又ok淋。3)      蔥花炸兩腸竟然係入面條油炸鬼ok，反而啲腸粉皮太黏太靭。4)      薑蔥牛肉餃一嚟到原來發覺係山竹牛肉放入面，然後煎餃皮包住，冇乜期望之下食落反而有驚喜，竟然最好食係佢。5)      最後呢係海南雞卷，一上枱先發現原來係雞包仔，早知叫叉燒包好過。抵食2分：飲茶嚟講應該大把選擇，要環境好就要畀多少少溢價，但食物質素唔代表會好好， 所以畀兩分。