籠太子點心專門店 (已結業)

宜家除咗去酒樓之外其實仲有好多地方食到㗎，今日同朋友行緊銅鑼灣嘅時候就發現到一間新開嘅龍太子，主打係精緻點心。所以點心都係即叫即做，我就叫咗籠大蝦燒賣先，蝦身爽口都算大隻。奶黃迷你煎堆，粒粒都炸到金黃色，裏面嘅流沙奶黃熱辣辣，食嘅時候小心辣親個嘴。香蒜蝦春卷，外皮炸到蝴蝶結咁外貌已經攞晒分，仲有蒜蓉同爽口嘅蝦粒。海皇芝士千絲卷，用麵條做炸皮，溶咗嘅芝士加埋海鮮粒，都幾開胃。布拉白腸粉，米漿味濃，食落帶綿加有少少煙韌感，加少少麻漿豉油，唔錯。喺出菜位偷偷見到啲廚師即做腸粉，唔怪得咁綿啦~食完個白腸粉，真係唔錯，所以叫多個不是炸兩，原來係腸粉包住脆卜卜嘅嘢，好似春卷咁。入面有蘿蔔絲同埋個芹菜粒。。好味香滑反斗榚，好似係馬拉榚嘅BB版，一口一個，唔怕夾到爛曬。再叫埋個綿花雞，用嘅都唔係豬皮，係筒形魚肚，魚肚吸晒滑雞嘅精華，滑雞蒸到啱啱好無雪藏味，加埋半粒厚冬菇，份量好足。最後就叫埋個古法糯米飯，有炒花生同蛋絲蔥花喺面，而糯米飯粒粒嘅顏色都炒得好平均，口感煙韌。每籠都係講緊十零廿蚊左右一籠，可以食到即叫即造，喺銅鑼灣嚟講都算係唔錯嘅選擇。