籠太子點心專門店 (已結業)

今日去咗筲箕灣嘅東大街，好多嘢食，揀咗一間食點心嘅。試咗個原隻鮑魚燒賣，鮑魚比我想像中大喎，蟹子份量都唔少。再叫咗瑤柱灌湯餃，係我去酒樓必食咖啦，灌湯餃足料，加紅醋食仲正。晚餐有啲飯都好嘅，好彩佢哋有蒸飯，揀咗北菇滑雞飯，冬菇肥美，雞柔嫩。今晚好幸福，揀咗幾個甜點。椰汁桂花糕，桂花清涼椰子味香。香芒沙律盞，造型搶眼，以芒果醬點綴水果沙律。海皇芝士千絲卷，炸得金黃色，香口鬆脆，芝士味突出。其實仲想試多幾樣，但眼闊肚窄，唯有下次啦。