御名園 (已結業)

今日同媽咪仲有契媽一齊飲茶，契媽話天晉有間點心唔錯，細細間比較清靜又坐得舒服嘅酒樓，仲話有人為咗一個點心由流浮山都過嚟飲茶，講到咁誇張一定要試下啦。我哋大十點左右到，的確係比較細，但係無因為咁而將啲塞到好密，所以都算幾靜同舒服，點心嘅味道亦真係唔錯，早巿有孖寶優惠，十二點半前埋單價錢都幾抵。遠年陳皮牛肉球，肉唔會太淋太削，唔錯。黑松露鮮蝦燒賣，唔係點食得出黑松露味，不過都幾好。花膠灌湯餃，呢個就係契媽講有其他客人好遠都嚟食嘅點心，係幾好味嘅，皮滑湯濃。鮮牛肉軟滑腸粉。蔥花炸両腸粉，裏面仲脆㗎。蠔皇流汁叉燒包，雖然個樣好似麻麻，不過裏面嘅叉燒都幾足料。香煎臘味蘿蔔糕，唔散又唔硬。薑汁千層糕，唔膠嘅糕，夠煙韌。鬆化脆蛋散，又搵到一間係酥化唔係脆嘅蛋散。銀魚仔雞粒飯。鳳爪排骨飯。