走過十萬八千里找到你

營業中

休息中

十萬八千里之前已經黎過一次，以打卡餐廳黎講佢啲野算幾好食，食物都好夠熱，所以就算唔為打卡，都會再黎幫趁。平日lunch time冇晚市咁多人，乾花加上壁畫，都係有日光嘅時候顯得特別靚。佢地有飯、意粉、主菜都有供應，所有食物最平加$45就可以轉套餐，跟埋麵包、湯同飲品。湯同麵包上枱時都係熱嘅，唔係暖，係熱！麵包好軟熟，因為夠熱，所以麵包香更突出。餐湯係雜菌忌廉湯，口感順滑，菌味清香。磯燒魷魚筒墨魚汁意大利飯($148) - 意大利飯有咬口得黎唔會太硬，中間仲夾雜左啲魷魚鬚令口感更豐富，磯燒魷魚唔會燒到乾柴柴。北海道帆立貝海膽醬扁意粉($178) - 意粉軟硬適中，每一條都掛滿海膽醬，味道濃郁，上面再放左鰹魚碎同紫菜。海膽醬係偏杰身，建議盡快食，否則凍左會凝結。帆立貝有兩大隻，非常大隻同厚肉。蜂蜜柚子梳打(跟餐加$55) - 梳打甜度適中，梳打味唔會太重，甜甜地幾清新。咖啡莫卡(跟餐加$55) - 朱古力味同咖啡味平衡得啱啱好，有咖啡香又唔會太苦。總結，由麵包餐湯到飯麵，每一樣食物都好夠熱，食物睇得又食得，價錢同一般打卡cafe差唔多，所以就算打完卡都會有令人回頭嘅衝動。