鼎·會館 (已結業)

比起千千聲嘅私房菜呢邊取向明顯親民得多，九道心思手工菜令人食得津津有味。頭盤龍蝦兩味印象深刻，一邊類泰式沙律處理酸甜開胃，另一邊以泡椒上汁帶微麻辣夠醒神。之後三小碟精緻創新，特別係中間嘅麻香口水竹絲雞，係一個麻辣版嘅雞絲粉皮，由夏天清涼嘅青瓜麻醬，變成入秋保暖嘅麻辣，雞都轉為滋補嘅竹絲雞，化解麻辣帶來嘅火氣兼為開始乾燥嘅天氣帶上一點滋潤。當然單睇肉絲切得微細分明已經盡顯功架嘅酸辣羹都係又一開胃暖身嘅佳作。經過一輪開胃熱身嘅頭盤，之後到一連串阿爺招牌菜。 最特別嘅係紫晶生炒骨，同出面食開嘅生炒骨唔同，冇用酸味強烈嘅山楂，反而用偏清新嘅酸梅同青檸，加上紅肉火龍果令生炒骨更為調和。而我最鐘意係佢個燕液蛋白脆東星斑，斑塊炸得脆身但內裏依然保持嫩滑，加埋燕液蛋白芡濕潤返入口時嘅乾涸感。當然仲有最著名嘅乾炒牛河，周圍都介紹過除咗用牛肉眼做肉片之外，仲仔細到連河粉都係每更新鮮製造兼用人手逐條分開，炒功都了得，夠光澤得嚟又唔會好油，佳作。最後兩個甜品南瓜露夠滑，西米都特別大粒脆口。招牌阿爺菲林卷更加係必有，所謂菲林卷其實係黑芝麻卷好似舊時啲菲林咁，煙韌且帶芝麻香功架堅高，為呢餐帶來完美嘅總結。