意粉屋 (已結業)

是晚收工後同老婆嚟到尖沙咀諗住行街同食飯。但經過一日辛勞嘅工作，我地未行街就已經又攰又肚餓！所以二話不說，我地就嚟咗意粉屋食飯。老婆同我都鍾意食呢一類嘅食物，睇住menu有咁多款唔同嘅小食、pasta、pizza等等嘅美食......我地遲遲都決定唔到食咩好。好彩我地發現咗一個龍蝦二人套餐，套餐有酥皮龍蝦湯、芝士焗龍蝦帶子天使麵、燒豬仔骨同飲品。我地另外仲叫多咗個芝士焗茹子添~先嚟酥皮龍蝦湯：熱辣辣，湯無苦味...但亦唔夠鮮味。料都算多，龍蝦用雖然細粒但份量唔少兼有啲爽口。燒豬仔骨：超大份，兩個人嘅份量嚟講就真係好大份！燒汁味道唔錯，但肉質較"un"兼"chi"牙，過咗少少火喉，如果"林"啲就好啦。不過依家啲豬流感咁勁，都係熟啲穩陣好啲！芝士焗龍蝦帶子天使麵：配料份量適中，個汁都好好味。果然係推介食品~最後係芝士焗茹子：茹子用蛋醃好後再煎，配合芝士味道唔錯。但因為呢個菜嚟之前我地都已經食到好飽，其實呢個小食可以唔叫~但埋單total都只係三百蚊，都算幾抵食。另外呢度啲staff有service亦都有禮貌：點菜後佢地細心話你聽啲餸大約要等幾耐，同佢地講嘢時亦都會唔該前、唔該後。值得一讚！