龍門冰室 (已結業)

幾姊妹陪媽咪係觀塘道某大廚具公司shopping後，去左牛頭角道嘅龍門冰室開餐。店舖雖然細細哋，但坐落舒服吾逼。牆壁上大大個黑色鋪名跟白色的牆身成對比，好顯眼！ 打開餐牌，好多選擇:「常餐」「精選午餐/晚餐」「推介」「套餐」「全曰供應」「是日餐湯+沙律」「流心奄列餐」「鐵板餐」「小食」「飲品」同「甜品」，梗有一款啱你！ 老人家習慣左要有飯到肚，叫左碟照燒汁雞扒滑蛋飯配熱可力。雞扒大大塊， 煎蛋份量都唔少，落足本 。再加碟全走生菜，生菜青綠爽脆！ 大家姐叫左個蕃茄濃湯米線配3.6北海道牛乳炒蛋加叉燒，同熱華田。佢話蕃茄湯底好濃且酸甜適中，米線爽口，炒蛋香滑，叉燒够瘦。用個「勺子」裝住上，好特別！ 細家姐就叫左個奄列餐配凍檸水。佢話蛋煎到好嫩滑，厚多士焗到金黃香脆，再揸上香甜花生醬同煉奶，無得頂喎！當真？我試左一啖，果然(無得頂)!凍檸水大大杯，都有好幾片檸檬。 而我就叫左個香脆魚柳包餐配杏仁霜。個包即叫即做，好鬆軟脆卜卜，魚柳炸得好香脆，加埋D醬汁同新鮮生菜，好好味。杏仁霜濃香。 餐廳仲有咁多選擇，下次會再來試其他！值得一提係佢哋早餐時段延長至11:30，真係可以瞓晏D啦！