龍門冰室 (已結業)

牛頭角龍門冰室，今次係慕名而去，之前係openrice見食評話佢地既豬仔包好食，咁岩同阿女去開附近，就去試試。間野裝修都幾好，唔似一般茶記無咩靚裝飾，有我那些年既足球明星碧咸既大頭相，仲會播英文歌，環境整體干淨。同阿女兩個人唔食得太多野，所以叫左一份香脆豬扒包餐，加6蚊配左杯紅豆冰俾阿女。個包真係好好食，又厚又長，好脆，肉唔太厚但份量足夠，無油膩感，加埋菜同牛油，又爽口又香，果然無叫錯。唯一唔完美既係個面有少少烘耐左，有少少黑，未至於有大影響。另外仲叫左一份芝士焗西蘭花、一份黑松露薯條，再叫左杯龍鳳檸樂。個西蘭花熱辣辣，真係即叫即焗，幾爽口，搞到阿女同我爭食；個薯條唔算好突出，係個黑松露醬就好少茶餐廳可以叫到，係特色，味道可以。杯龍鳳檸樂係咸檸配檸檬，俾罐裝可樂自己倒入杯內，阿女見到咁就搶左黎飲，話咸咸甜甜好飲喎。