Lex Coffee (已結業)

充滿藝術氣息嘅裝修風格、高樓底加落地玻璃營造嘅空間感，嚟到Lex Coffee無論嘆咖啡定係食嘢打卡都好啱☺️同行嘅媽媽第二次嚟，佢仲留意到Cafe有換上唔同藝術家嘅畫作，好有心思呢～Lunch Specials選擇唔多但都啱口味，是日濃湯係大蔥薯仔湯，餐飲跟Americano/Honey Lime，加錢就可以upgrade其他咖啡。龍蝦意大利麵擺盤賣相好靚－細扁麵吸收曬龍蝦汁同蕃茄醬嘅精華，半邊龍蝦有膏又啖啖肉，仲有拆好肉嘅龍蝦鉗，幾有鮮味但可以更彈牙。牛肉三文治好足料有驚喜－牛柳片嫩滑醃得好夠味，同grilled cheese融合埋一齊更香口，墊底嘅沙律菜亦加咗黑醋，食落味道好豐富。午餐可以優惠價加配cheesecake，但見到menu上嘅甜點更吸引－Tiramisu嘅手指餅比較濕潤，酒味突出唔會好甜；焦糖脆脆加上香而幼滑嘅燉蛋，Crème Brûlée真係一個令人無法抗拒嘅甜品呢～配合番art meets coffee嘅主題，依度仲可以飲到特色嘅藝術打印咖啡，下次再嚟試吓先！