合十 (已結業)

都係無聊隨手睇吓開飯有咩新舖……手機碌嚟碌去，就見呢間「合十」，見名以為素食，原來是一打卡cafe。入apm往Godiva 方向落左邊短電梯或樓梯，靠右就見港貿中心，繁忙時間唔想等𨋢可用玻璃正門左邊側邊行兩層就到。一出𨋢，裡面之侍應已急不及待「恭迎」，安排咗最入面帳篷般半室外嘅6人枱。但其實枱偏小偏窄，實則頂多坐3-4人，其餘凳俾人放袋唧。靠的是幾部座地冷氣機，如夏天坐此處可能有點熱。邊埋坐位邊心心眼，一排排垂吊落嚟啲燈飾未免太靚漏，身旁的兒童發出嘩嘩聲，大鄉里出城。因要等埋朋友，錯過咗晚6點前可嗌嘅餐，手機落單下揀咗 兒童餐A，該兒童旋即消滅茄汁意粉（不太酸、仲有啲蕃茄蓉），薯條（鹹淡度適中），炸雞（隔離位都聞到香味，炸得剛好又少脆漿）。我頗鍾意個燒牛肉紫洋蔥沙律，尤其喜歡入面燒新鮮菠蘿，啖啖有汁，燒牛肉夠牛味又唔靭，只係略嫌太少醬汁，例如啲醋落得太輕手，唔夠吊味。自家製茄汁香草腸意粉，汁底同兒童餐個意粉沒兩樣，但個切片香草腸就有啲奇味……有啲就太勁類似尤加利嘅香草味，趨向藥油味，但有啲又正常，如果呢啲香腸係自家製，估計係香草分佈唔平均所致。