Orange Elephant Thai Restaurant (和富) (已結業)

舊同事飯聚，想搵間坐得舒服又傾到偈嘅食肆，結果嚟到和富中心呢間泰國菜。我哋呢啲精明眼，首先梗係點個加 $1 優惠菜式，今日 offer 嘅係泰式香茅炸豬扒，豬扒較薄身，所以唔會韌，蘸埋特製酸辣醬汁一齊食，都幾惹味。伴碟嘅酸甘筍同酸青瓜份量唔少，食下一條食下一條，愈食愈開胃。叫多個焗大頭蝦粉絲煲，上枱時已經聞到香味，兩隻大蝦開邊共四份，不過最吸引嘅反而係底下嘅粉絲，用咗好多配料炮製，包括花椒，八角，蒜頭，蔥頭，韭菜等等，做法較為中式，味道豐富，亦夠飽肚。再嚟個咖哩海鮮脆包盅，呢個咖哩入面加咗蛋花，咖哩味唔算濃，但質感都幾豐厚。海鮮有魚，蝦，青口，魷魚等，再加埋紅椒，青椒，洋蔥等配料，同麵包一齊食，又係飽肚之選。飲品方面，最正係特選椰青，大大個，清甜多肉，好飲；對面位叫咗杯龍眼冰，佢話一貫嘅泰式風味，清甜有果肉；隔離位杯芒果冰特飲有果肉有果蓉，不過佢話甜咗少少，如果做到沙冰嘅質感會更好。