鮨川 (已結業)

Aqua 有幾間食日本野嘅餐廳，今次就試咗鮨川。唔知係因為坐咗吧台定係因為午市嘅關係，嗌咗12貫壽司lunch set 竟然享受到 omakase 嘅感覺，先上前菜，有好嫩滑嘅茶碗蒸，沖繩苦瓜。食完前菜，師傅就依次每件壽司上，由淡到濃，而且仲會提你食法，每件壽司除咗係非常新鮮之外，仲會有師傅秘製醬汁，真係好多舊都唔使點豉油同Wasabi，都好好食。12件壽司大概有：左口魚，油甘魚，赤貝，海膽，牡丹蝦（牡丹蝦上有啲脆脆嘅口感，原來係用蝦頭蝦殼整成），深海池魚，金目鯛 ，喜之次，池魚，拖羅，拖羅蓉手卷。 成餐飯除咗食到每樣食材嘅鮮味之外， 仲食得出師傅嘅堅持同匠心。