華苑酒家 (已結業)

有聞媽咪屋企附近有一間酒樓夜晚時段嘅邊爐任食都只係138蚊，仲要唔使加一兼啤酒任飲，咁抵即刻叫佢落嚟一齊試下先。唔好以為佢收138蚊就流流啡喎，淨係湯底都有成11個選擇，加埋30幾款任食火鍋配料同埋 青島森堡任飲，淨係見到張餐牌紙都覺得抵番哂。喺11個選擇之中揀咗醉雞湯底，估唔到碟雞有咁大碟，湯底相當足料，有淮山杞子牛蒡紅棗同埋圓肉，夠哂滋補養生，雞肉嫩滑，如果再醉啲嘅話應該會更好。醬料嘅選擇都唔少，特別喜歡右手邊嘅豆瓣醬同埋xo醬。脆肉鯇係估你唔到咁肥大，仲要好厚身，塊塊新鮮爽脆，加少少浸過豉油嘅香蔥蒜蓉同埋辣椒就係最佳配搭。肥牛十分肥美，膽固醇萬歲。呢度竟然有豬潤同埋豬肺嗌，豬潤色澤紅潤，一睇都已經知道係新鮮貨；豬肺飛過水，唔使淥好耐就食得。食到個肚好飽都未試哂咁多款式，又有藉口再嚟多次。