勝記酒家 (已結業)

返工成日經過見到呢個大招牌，知道勝記出名食乳豬，老公今晚忽然好想食乳豬，就帶佢來試試。乳豬可以半隻咁叫，其實我覺得2個人叫半隻都唔會覺得太多。除左乳豬其他小菜都係一百幾十蚊，價錢合理。首先來就係醬烤乳豬，雖然半隻但份量唔算好多，加上我老公係食肉獸，KO半隻豬絕對無難度。乳豬外皮香脆，肥瘦均勻，咬落肉質嫩口，肉味濃帶點咸香味，就算乜醬都唔點都好好味，2個人邊食邊飲啤酒，好快已經清曬，個豬頭我地都唔浪費，打包回家煲粥，正！👍🏻小菜我地只點左2款，西蘭花帶子，新鮮蔬菜一定好味，帶子亦都好大粒，咬落口感覺肥美。最後點左另一招牌菜乾炒粉絲，雖然聽落平平凡凡，但粉絲可以炒到就乾身，絕對考廚師功夫，加上蝦乾及碎肉、蛋絲，食落多重〇感，味道都做得不錯，好夠味，成個菜好有特色。