安利魚蛋粉 (已結業)

星期三，天氣晴朗無雲。筆者特地放半天假，陪同太座往東區醫院作例行懷孕檢查。BB女於媽咪肚入面已經五個月了，身體發育一切正常，可以放心。檢查完畢，是時候解決生理需要，應太座嘅要求，到筲箕灣食麵去。到筲箕灣食麵，「安利」係必然之選。早上十一點幾，人客不多，好容易就搵到位坐。搬了新舖位，係舊舖嘅斜對面，地方寬敞了，燈光亦通明了。也是點了一些耳熟能詳嘅名物，如片頭坑腩撈粗、奶油多及奶茶等。片頭彈牙，金黃色嘅外衣亦甘香；坑腩嘅腩肉、牛筋一層叠一層，充滿牛肉香味，加上牛筋嘅爽滑，是人間極品，嗜牛者不可不吃；撈麵依然保持水準，麵條表裡色澤如一，証明撈得十分均勻，麵條亦有咬口，上乘之作。伴碟嘅清湯鮮甜味美，入口便盡是大地魚肴出嚟嘅湯味。奶油多平面面積比一般的少，但麵包較厚身，而且絕不吝嗇牛油，整塊牛油是密密鋪在多士上。多士沾滿了煉奶，加上牛油嘅微鹹香，令人愛不釋手。再來一杯香滑嘅奶茶，這個brunch便完滿了。太座進食完畢之後，小B女在媽媽肚內踼完又踢，連佢都話好味，舉腳贊成。埋單都係五十幾蚊，平均都係廿零蚊。雖換了新舖，但食物質素依然，是謂「新瓶舊酒」。