BOM Cuisine (已結業)

近來荔枝角區愈來愈多特色食市，今次我試咗依間葡國菜餐廳。佢位置係係青山道一個轉彎位既第一間，嗰帶雖然離地鐵站遠咗一啲，但正正係咁，所以做就咗一啲小店可以生存到。餐牌上小食佔咗一版，係因為店主發現，多咗人鐘意去佢度飲酒，所以推出多啲小食去配合。雖然我就無飲酒，不過都點咗兩個小食。第一個係好特色，店主獨家製作既凍去骨豬手配蘋果醬。無諗到豬手可以配蘋果醬，而且蘋果醬調配到同豬手好夾，食出黎好特別，將豬手變得無咁膩，有一種清新。依個明顯係配合香港人鐘意食牛肉既菜色，蒜香炒牛肉粒，蒜味唔太濃，牛肉肉質鮮嫩，但牛肉味唔算好濃。重點既招牌葡萄牙烤乳豬，用鐵板上淋上莎莎醬時仲炸炸聲，乳豬超好味，皮脆肉厚，就算唔點醬乳豬已經好好味，皮香口而肉質嫩，好食過平時食到既乳豬好多。最後食埋個意粉就啱啱好喇，三文魚墨汁意粉拌菠菜，意粉好夠味，三文魚無咩多餘既調味，食到三文魚本身既鮮味。依間係好有誠意既小店，有自己既特色，店主熱情有禮，會主動同雇客傾計，亦好樂意分享依間餐廳既點滴，多一分人情味，好值得支持。