黃金燒味 (已結業)

今日去完gym等朋友收工，大家都好肚餓，經過門口見到呢間燒味餐廳有好多燒味選擇就入去試下。睇下餐牌(餐牌相)，連叉燒都有兩款，又想食蒸魚又想食燒味，最後就揀左二人套餐。先黎左碟鵝掌鵝翼同骨湯菜心，鵝掌鵝翼好有咬口，味道有D似白鳳爪，不同之處係中間會多D肉食。菜心用骨湯浸熟，有D肉骨茶Feel。燒味方面就揀左乳豬拼燒鵝，乳豬皮脆惹味，燒鵝唔會有騷味，唔太油燒得好好，點埋個醬更加減到油膩感。蒸魚方面叫左豉汁蒸倉魚，貪佢少D骨，條魚蒸得岩岩好，肉嫩好易夾起，條魚都幾大條。雖然都食到飽飽地，但見隔離枱枱都有叫肥膿腩叉，忍唔住都叫左碟試下，唔試唔知道，今晚既MVP原來就係呢碟特級叉燒，味道口感都係一流，唔怪得寫住數量有限，售完即止，絕對係必叫之選。另外晚市點餐都有煲足5個鐘既老火湯送埋，飲得出真材實料冇味精，仲要好大碗，頓時覺得個餐好抵！最後飽到不得了，灣仔區好多餐廳又貴又唔太好食，呢間真係叫高CP值，下次黎到一定要再叫肥膿腩叉！P.S. 怡姐(唔知有冇打錯名)好熱情待客，個個店員都同客有講有笑，舖頭充滿住人情味，食都食得開心D。