瘋鳥 (已結業)

今晚約左個舊同事提早食佢餐生日飯，我提議黎呢間瘋鳥食。餐牌選擇唔算多，我地最後叫左美式BBQ豬仔骨、三重芝士炸蝦Pizza、蜂蜜蛋糕、特濃朱古力麻糬窩夫(配雪糕)。美式BBQ豬仔骨個醬汁唔錯，唔會死鹹。豬仔骨夠軟淋，配埋薯條同沙律，正。三重芝士炸蝦Pizza有驚喜，濃濃既芝士但唔會膩，炸蝦大大隻，同pizza都幾夾。Pizza底唔係薄到冇食過野甘個種，係有啲厚度，甘先有咬口，我鍾意。蜂蜜蛋糕好多層次，口感軟綿綿，仲加左啲果仁，充滿濃濃既蜂蜜味，所以偏甜。特濃朱古力麻糬窩夫配朱古力味雪糕，賣相吸引，窩夫加左麻糬變得煙煙韌韌，甜度亦岩岩好，好食。