Spring field (已結業)

越南嘢同日本嘢我地平時就食得多，但係你有冇諗過兩種菜mix埋可以擦出咩火花呢🤔🤔？去Spring Field就可以比到一個答案你🤤🤤！首先餐廳係唔接受book位嘅。如果唔想排咁耐隊嘅話就要儘量避開lunch hour🤣🤣。我去到果陣已經係下晝1點幾，不過都要等大約25分鐘先可以入座。店面好有日本酒吧feel，除左有平時坐開嘅2人/4人檯仲有吧檯同高凳，可以望住廚師係開放式廚房入面烹調美食😍😍。我order咗招牌春園河同凍香橙紅茶。碗河粉用咗和牛湯底，飲落清清地，唔會覺得油膩。而餸就有半生熟安格斯牛肉、慢煮牛肋條同蘿蔔粒。生牛肉片嘅厚度適中，咬落唔韌，而牛味亦相當濃郁。至於牛肋條，食得出有用心慢煮，因為放落口有種即溶既感覺。蘿蔔原本expect係用黎吸收和牛湯底嘅精華，但係出其不意，食落竟然有關東煮嘅味！凍香橙紅茶落咗新鮮橙片，入口好清新，啱晒用黎送偏清淡嘅牛河。順帶一提，店方亦有提供日本拉麵店常見嘅餐前小食：涼拌辣豆芽比食客享用🤤🤤。本身打算叫埋季節限定食品：特濃日本雞蛋布甸+自家製咖啡淡忌廉嘅，可惜職員話賣曬，希望遲啲有機會可以再試啦～