PizzaExpress (皇后大道西) (已結業)

臨近12月，四周圍已經開始有聖誕氣氛，所以我都即刻約咗朋友，去西營盤嘅PizzaExpress 正式開始食聖誕大餐。打開張聖誕咭咁嘅Menu，我同朋友揀咗好有節日氣氛嘅麵包球聖誕樹、健康嘅黑醋油封鴨腿血橙沙律、同睇落好吸引嘅意式龍蝦海鮮湯粗管通粉。聖誕樹麵包球質感有啲似Pizza批，上面鋪咗層芝士同辣肉腸，仲加咗少少芝士粉同香草。就咁食又得，點埋辣醬同香草醬就更惹味，作為前菜一流。餐廳仲好有心思咁擺多咗一粒星形嘅包喺火箭菜上面，好似一棵聖誕樹咁。黑醋油封鴨腿血橙沙律有紅菜頭、車厘茄、血橙同牛油果，用料非常新鮮。油封鴨腿嘅油分適中，唔會太乾身，配合甜甜酸酸嘅黑醋一齊食又唔會太油膩。沙律嘅份量比想像中多，兩個人分都夠食。意式龍蝦海鮮湯粗管通粉有半隻龍蝦，非常吸睛。通粉其實仲有其他海鮮，有青口、蟹肉同蝦，絕對值回票價。龍蝦湯味道濃郁之餘帶有蕃茄嘅甜味，同時加咗車厘茄同少少辣味，令到味道更有層次。龍蝦幾好肉地，又有蝦膏同蝦子，增加風味。覺得唔夠喉，我同朋友再追加左一個 Tiramisu，Tiramisu嘅Cream好幼滑，亦有陣陣咖啡味，酒味唔係咁重，上面仲有粒士多啤梨，小朋友食都好適合。