淥鼎記

營業中

休息中

朋友介紹咗創興廣場嘅淥鼎記火鍋放題唔錯，於是今日放假就同老公一齊出去試吓啦！呢間餐廳主要以卡位為主坐得好舒服，唔會好似其他火鍋放題咁迫咁有壓迫感。我哋試咗呢度嘅小寶套餐， 7:30前埋單只需要$228再加一任食兩小時，佢哋仲可以另外加$28轉做酸菜魚、雞煲或者椰子雞鍋等等，但係我鍾意食麻辣火鍋，所以就叫咗鴨血麻辣鍋，麻辣鍋底夠麻夠辣仲有好香嘅花椒味，佢哋亦有四款前菜包括炸花生甜腰果、雞翼尖、木耳同埋炸魚皮。肉類方面可以任叫肥牛、牛板翼同埋牛板腱，呢三隻牛嘅肉味都唔錯，我就鍾意牛板腱同埋牛板翼，所以都叫咗好多碟🐮呢度亦都有手打墨魚丸，細細粒但係好有鮮味，呢度仲有唔同嘅飲品包括左不同嘅汽水仲有兩款特別嘅竹蔗茅根同埋洛神花茶，杯入面真係有啲茅根係入邊㗎！足料又夠晒清熱，醬料方面有超過十款同埋出面有好多唔同嘅火鍋食材，包括左有我最鍾意嘅鴨血、水魷魚、萵筍、蟹柳、薯粉、龍蝦丸等等….仲有一啲新鮮包嘅雲吞同魚皮餃😋呢度好啱情侶或者朋友嚟，坐位私隱度高亦都乾淨企理，服務員收碟快，性價比高下次可以再嚟試吓唔同嘅鍋底。