澳門台山水佬榮火鍋專家 (已結業)

初哥打食評，專登揀左間自己鍾意食既菜館評下分。如果你係因為食左正宗澳門水佬榮而慕名幫襯香港分店，你或多或少會有啲失望。係澳門店食，最大驚喜莫過於係個煲食極都食唔曬既花甲，同埋足秤又大隻既鮮甜肉蟹。而香港店呢肉蟹尚算新鮮，但花甲就唔太夠食啦。(雖然我地叫細鍋，但花甲數量真係唔太夠喉)。食完個蟹煲當然要食埋佢出名牛星拱照啦，。底層係特級手切肥牛，雪花分佈得幾均勻放係湯度啅幾秒就食得。第2層係薄切牛舌芯，估唔到除左串燒之外牛舌用黎打邊爐都好爽口。第3層既牛仔肉粒，食完真係要大叫"好好味呀"。食用時千祈唔好心急，放係湯度慢慢滾，大約15至18分鐘就食得。牛肉粒既脂肪比較多，非常多汁可口。3人行真係唔食得太多野，但又唔忍心嘥左個湯。最後決定叫個出前一丁，麵條吸左滾過海鮮同牛肉既湯汁好鮮甜。簡直為今次邊爐作完美句號。是晚餐單:辣汁花甲肉蟹雜菌煲:168 (煲價)+384(肉蟹)牛星拱照:398生菜:28出前一丁:18/個紫貝天葵:48/楂