百匯酒家

營業中

休息中

18:07 Sat 23th Apr 2023 毛毛細雨葵涌葵盛東 百匯酒家今次就要嘗試點樣可以淨係叫1隻片皮鴨出篇食評。呢個優惠18:00開始，準時入席，冇乜人好靜。但係唔好睇睇小呢間嘢，賓客陸續入坐，好多都係街坊熟客，同啲夥計有講有笑，證明呢間嘢係有實力留住食客長期幫襯。環境乾淨企理，雖然我係村外客，部長一D唔怠慢，淨係叫一隻鴨都笑語盈盈。片皮鴨餅皮、片皮鴨、蔥、青瓜、片皮鴨醬 一次過上枱。餅皮熱辣辣，好特別係長方形，原來咁樣包片皮鴨好方便，餅皮同埋鴨件嘅數量啱啱好。個汁醬比較杰，所以唔好咁貪心落少少就夠啦。青瓜同埋蔥花 正常，數量都足夠。D鴨件片嘅手工就好一般，不過街坊酒樓唔係睇呢啲嘅。鴨件上枱嘅時候皮係脆㗎，肥脂亦都唔太多，剛剛好。記得俾$10攞埋個殼啊，返到屋企拆肉都夠煮2個餸，個殼煲埋個粥。超抵呀。