J POT (已結業)

同朋友喺總統睇完戲，就行咗入去隔離街嘅呢間J pot烚下烚下，一入到餐廳個感覺好grand 同平時食開嘅火鍋店好唔同，餐廳係以音樂做主題嘅，打邊爐嘅爐係用一個鼓黎做裝飾，梳化係用咗琴鍵嘅設計，仲有個大螢幕係播住周杰倫演唱會添，成件事好有feel~因為太肚餓嘅關係一嚟到就已經嗌咗碟小食！黃金魚片頭 - 夠晒彈牙！ 加埋個秘製醬汁，酸酸地味道好夾好開胃~落完單之後，店員就拎咗個醬料架畀我哋混醬，重推介如果鍾意食麻辣同海膽嘅話，可以加錢試下佢哋自家設計嘅醬汁 - 秘製麻辣醬油&海膽醬汁，兩隻醬都好特別好有特色，特別愛嘅係麻辣醬，因為好香，令到食物嘅味道勁加出！終於到主角出場 - 北海道毛蟹鍋， 成隻蟹放落去煲湯，想唔甜都難啦，而且店員仲話，佢哋嘅湯底同醬料都冇加味精，令我即刻好放心咁飲咗好多碗湯㖭😂※推介※ A5 日本和牛拼盤 - 一次過試曬咁多個部位，真心正！店員教我哋由油脂少嘅開始食起，咁樣先可以食到個層次，牛味香濃，肉質嫩滑，而且入口即溶，真係會令人食到心心眼😍蝦滑+蟹滑一咬就食到有膠質口感， 蝦滑大家平時就食得多， 蟹滑大家應該比較少食， 店員仲會幫手同我地落鍋， 岩哂我呢種懶人。