18巷泰國餐廳 (已結業)

好驚！真係好驚！朋友話帶我去食泰國珍品，我以為係山珍海味咁正點啦，點知佢帶我去食螞．蟻．蛋！oh my god我坐低果下真係好想起返身走～算啦人一世物一世，佢地講到呢d火蟻蛋由泰國直送過黎，又含豐富蛋白質咁，好啦我都係乖乖咁坐定繼續等上菜。第一道就黎個螞蟻香葉包，也就是蟻蛋沙律…我一啖放晒入口，但由於有腰果同甜酸醬的關係唔係好食到蟻蛋的口感，但件事係好食既，我知道了原來沙律加腰果原來係極品～第二道菜黎個咖哩牛尾，個蒜蓉包真心點咖哩好好味！不過牛尾如果再稔小小會更好。泰國菜都有燉花膠，仲加左蟹肉入去燉，好濃郁好正！再來兩道蟻蛋煎蛋同螞蟻蛋冬蔭功泡飯…我真係過唔到自己果關，輕嚐了一下，其賓蟻蛋係冇咩味既，小小彈牙，又冇咩野既只係我個心理關口…不過唔好諗佢有蟻蛋係入面既話，呢2道菜味道係非常好既。炒蟹極級好味！隻蟹好大好新鮮，也是今晚我的亮點呀～可能朋友知我怕食蟻蛋，所以叫左我最愛的酸甜魚，食左好多舊好滿足！最後以榴蓮糯米飯作結，椰汁的甜度圓滿了我，也代表我從蟻蛋世界出道了。