Amazing

營業中

休息中

泰式豆醬香蒜炒通菜 HKD98食親泰國餐廳，我都一定會叫返碟炒通菜，貪佢爽脆又惹味～不過呢道通菜就有啲唔同，因為佢主要係用泰式豆醬，而唔係馬拉盞(蝦醬)。雖然豆醬炒食落一樣咁惹味，但味道就好明顯無咁香濃，同埋無咗蝦醬嗰陣獨特嘅鮮味，硬係覺得好似少咗啲野咁，所以我都係比較鍾意馬拉盞炒多啲～大頭蝦冬陰功 HKD138呢煲足料冬陰功好豐富，一望落就已經見到滿滿嘅湯料：大頭蝦、蕃茄、香菇、各式香料⋯飲落酸酸辣辣，又帶少少甜味，將我沉睡咗一日嘅味蕾完全喚醒，就算平時怕辣嘅我都對佢欲拒還迎，因為真係好開胃好惹味～大頭蝦睇落大大隻好多肉咁，心諗應該幾正，但點知肉質咬落又梅又老又爛，一就係本身唔新鮮，二就係煲得太耐，總之都係飲湯算數～芭堤雅香草燒全雞 HKD178呢隻燒全雞用嘅係春雞仔，一般都比較細隻，所以唔會話好多肉，就算兩個人都可以輕鬆食哂，唔會飽。味道嚟講，都幾入味，特別係我最愛嘅雞皮，燒到又香又脆，就算唔點泰式辣醬食都已經好惹味～不過佢嘅肉質就普通咗啲，得雞脾位叫做嫩滑，雞胸位嘅肉都偏乾同嚡⋯無預期中咁好食。