The Roundhouse Taproom (已結業)

中環Soho區周圍都係酒吧，花多眼亂，有時候都唔知點揀。但係有啲小店其實好有驚喜，就好似今日嚟到呢間roundhouse taproom咁。雖然佢唔係喺正斜路最旺嘅區域，但係啲食物同飲品係絕對有質素！呢度有賣港產手工啤，梗係要支持下本土嘢啦！今次就試一隻叫Hazy Pale Ale嘅手工啤，飲落超香果味，類似熱情果咁嘅味，又唔苦又唔算高酒精濃度，酒量唔高但又想飲嘅又或者女士飲都好適合！除咗手工啤呢度嘅食物都非常好。店員會好貼心咁提醒客人有啲食物嘅份量比較大未必適合兩個人叫，所以今次我就淨係叫咗一個Big Boy Burger，一份水牛雞翼同埋一份Crispy Bacon。個Burger絕對係滿分！漢堡扒熱辣多汁，啖啖肉大滿足！至於雞翼其實有幾隻味揀，今次食呢個水牛雞翼就非常惹味，但係唔食得辣嘅朋友就可能要揀其他味道啦！個煙肉都烤得非常香口（掛住食唔記得影靚相），如果只係嚟飲杯酒吹下水，叫來做小食送酒啱晒。每個小食旁邊都會有啲西芹同蘿蔔同一個凱撒沙律汁，可以當清新口腔去食其他嘢。總括來講算係一間好高質嘅酒吧餐廳！