Ulyssa by Aldou (已結業)

是日同中學同學聚會，因為就有人喺荔枝角遲收工，就揀咗喺荔枝角嘅樓上cafe. 當日搭巴士去，一落車就對正餐廳大廈嘅入口，都好方便，唔會太難搵。由於太肚餓，我哋未齊人嘅時候已經嗌定三個appetizer食住先，嗌咗黑松露芝士醬薯條，椰香金沙珍寶軟殼蟹同埋泰式香料煮鮮藍青口。黑松露芝士醬薯條都係一般嘅黑松露味沙律醬加上薯條上面，而青口都好食但唔算話好特別，個軟殼蟹就比較特別少少，有椰子碎同鹹蛋黃碎，食落有鹹有甜幾得意。主菜因爲想share,所以主要都係叫pasta,叫左溫泉蛋spaghetti carbonara,北海道帶子海膽汁墨魚意粉，慢煮鴨胸青豆意大利飯，香煎鵝肝牛肝菌意大利飯，羊肚菌蝦籽意大利粉同埋低溫慢煮豬鞍架配楓樹糖芥茉汁。 比較推介鴨胸青豆意大利飯，唔係個個都鍾意食青豆，但其實佢個青豆已經同個risotto融為一體，唔會話食到一粒粒青豆，而青豆嘅清新可以中和返忌廉嘅膩。另外個豬鞍因爲係慢煮，所以都keep到肉質嫩滑，怕食「揩烚烚」嘅人都唔怕食喇。