茶涮涮 (已結業)

喺名店坊呢邊搵食其實都唔錯，有熱鬧氣氛嘅，有舒適又chill chill地嘅，俾街角位置環境氣氛唔錯嘅日式火鍋店吸引～套餐幾抵食，有前菜沙律又有刺身三點，仲有海鮮拼盤、肉拼盤同野菜拼盤，呢個價錢夠晒豐富！海鮮拼盤有齊大大隻野生虎蝦、帆立貝、同野生海魚！虎蝦肉結實鮮甜，又夠晒大隻，帶子切成薄片，淥一淥入口軟熟～海魚肉質彈牙結實，唔錯唔錯！肉類有澳洲一級肉眼，美國安格斯牛小排，美國牛五花，同無激素春雞！肉類都相當唔錯，和牛肉眼油花豐富肉質又甜！安格斯牛小排油花均勻，肉質鮮嫩～野菜拼盤款式又多又新鮮，有切花紅蘿蔔，望落食落都特別開心！