The BASE nature (已結業)

平時嚟到荃灣都會去d細街搵食，但今日有少少雨，所以就喺附近商場搵食。見到呢間之前食過一次，味道唔錯，但個menu就轉咗，所以再試一次。平時食西餐都會要個湯同飽，食主菜前濕一濕個口。個湯有少少辣，飲完之後，喉嚨會有少少辣味。個麵包就乾食好味d，濕咗會好淋，口感一般。第一個主食就係海鮮飯，都幾豐富，有大蝦、櫻花蝦、青口、蜆同八爪魚。大蝦d肉好結實，煎得好香。櫻花蝦撈飯一齊食，食到好香蝦味。個飯有啲似意大利飯但濕少少。整體唔錯。第二個主食係豬鞍，一上台就覺得好似好少嘢食，但食食下都幾飽肚。個豬鞍好淋，重煎到好香，加埋個汁有少少甜甜哋，食埋唔會好油膩。隔離啲配菜都比薯仔或者薯條好食，有南瓜、蕃茄、蘑菇、蘆筍，款式好多。推薦。最後加埋個菠蘿梳打，食咗咁多海鮮同肉，加埋杯梳打就可以清一清個味蕾，又唔會太甜而且仲有少少菠蘿肉可以食下咬下，唔錯。